Yn ddiweddar, cafodd rhodd garedig o £200 (+GiftAid) ei ddefnyddio i gefnogi’r Tîm Nyrsio Plant Cymunedol Integredig (ICCNS) drwy ddarparu lluniaeth yn ystod eu Digwyddiad Dathlu Staff.
Nod y digwyddiad oedd dathlu Nyrsys Ysgol, Ymwelwyr Iechyd a Nyrsys o dîm ICCNS. Mae’r staff yn gweithio’n galed i gefnogi plant yn y gymuned, gan ddarparu gofal i blant ag anghenion iechyd cymhleth a chyflyrau sy’n cyfyngu ar fywyd, mewn lleoliadau addysg, ac yn agosach at gartref.
I gydnabod ymroddiad a gwaith caled y tîm, gofynnwyd i’r holl staff enwebu eu cydweithwyr ar gyfer 7 categori gwahanol cyn y digwyddiad. Yna dewiswyd enillydd ar gyfer pob un o’r canlynol:
- Mwyaf Gweithgar ac Ymroddedig
- Chwaraewr Tîm Gorau
- Mynd yr Ail Filltir / Mynd Gam Ymhellach
- Ysbrydoledig / Model Rôl
- Dewis y Bobl
- Perfformiwr sydd wedi Gwella Fwyaf
- Arloesedd / Ysgogi Llwyddiant
Derbyniodd enillydd pob categori dystysgrif, ac anfonwyd llythyr at unrhyw un a dderbyniodd enwebiad yn rhannu geiriau hyfryd eu cydweithwyr. Gofynnwyd i staff hefyd ddarparu 3 gair cadarnhaol am eu tîm, a oedd yna’n cael eu cynnwys mewn darn o waith celf.
Hoffem ddiolch yn fawr iawn i Michael Mogan, a gefnogodd y digwyddiad gyda chyfraniad hael o £200 (+GiftAid) a ddefnyddiwyd i brynu’r lluniaeth. Roedd y tîm yn hynod ddiolchgar am garedigrwydd Michael a’i arwydd o werthfawrogiad.
Dywedodd Louise Young, Cydlynydd Datblygiad Proffesiynol o’r Gwasanaethau Iechyd Plant, Pobl Ifanc a Theuluoedd: “Roedd y lluniaeth hyfryd a oedd ar gael i ni wir yn un o uchafbwyntiau’r digwyddiad. Rydym yn siarad llawer am werthfawrogi ein staff, ond roedd y lluniaeth yn symbol go iawn o ddathliad. Darparodd Aroma ddetholiad hyfryd o de, coffi, dŵr rhew, rhywfaint o gacen, bisgedi a phlatiau ffrwythau mawr. Roedd y staff yn werthfawrogol iawn a doedd gennym ni ddim byd ar ôl!”
“Hoffai Claire, Kate a minnau ddiolch yn bersonol i Michael Mogan a fu mor garedig â’n galluogi i gael y lluniaeth, gan olygu bod ein sesiwn yn Ddigwyddiad Dathlu Staff go iawn.”
Roedd y Nyrsys Ysgol, Ymwelwyr Iechyd a Nyrsys o dîm ICCNS wir wedi mwynhau dathlu’r timau a’u holl waith caled. Rydym yn gobeithio bod yr enwebiadau a’r gwobrau wedi rhoi hwb i forâl ac wedi gwneud i’r holl gydweithwyr deimlo eu bod yn cael eu gwerthfawrogi.
Mae Elusen Iechyd Caerdydd a’r Fro wedi bod yn falch iawn o gefnogi Digwyddiadau Cydnabod Staff. Os hoffech chi wybod mwy am sut y gallwn ni gefnogi eich tîm, cysylltwch â fundraising.cav@wales.nhs.uk