Mae Jane Murphy wedi treulio ei gyrfa yn gofalu am gleifion ac yn cefnogi staff ar draws Bwrdd Iechyd Prifysgol Caerdydd a’r Fro. Ym mis Hydref eleni, mae Cyfarwyddwr Nyrsio’r Bwrdd Clinigol Meddygaeth yn rhedeg Hanner Marathon Caerdydd i godi arian ar gyfer Elusen Iechyd Caerdydd a’r Fro, achos sy’n agos at ei chalon.
Drwy ei rôl, mae Jane yn gweld y gwahaniaeth y mae’r elusen yn ei wneud ar draws ysbytai, wardiau a gwasanaethau cymunedol bob dydd. Fel elusen swyddogol Bwrdd Iechyd Prifysgol Caerdydd a’r Fro, mae’n ariannu prosiectau, offer a gwelliannau sy’n mynd y tu hwnt i gyllid y GIG, gan helpu i wella profiad cleifion, teuluoedd a staff.
Dywedodd Jane, “Fel Cyfarwyddwr Nyrsio ar gyfer y Bwrdd Clinigol Meddygaeth ym Mwrdd Iechyd Prifysgol Caerdydd a’r Fro, mae gen i’r fraint o weld ymroddiad, tosturi ac ymrwymiad ein staff yn y GIG bob dydd. Rwyf hefyd yn gweld cleifion a theuluoedd yn ystod rhai o adegau anoddaf eu bywydau.
“Dyna pam mae Elusen Iechyd Caerdydd a’r Fro yn golygu cymaint i mi.
“Drwy gydol fy ngyrfa, rydw i wedi gweld â’m llygaid fy hun yr effaith y mae’r elusen wedi’i chael ar ein wardiau. Mae wedi helpu i greu amgylcheddau tawelach a mwy croesawgar, wedi darparu offer sy’n gwella gofal cleifion, ac wedi cefnogi mentrau sy’n cyfoethogi profiad cleifion, eu teuluoedd a’n staff.
“Dyma’r adegau sy’n helpu pobl i deimlo eu bod yn cael gofal, yn cael eu gwerthfawrogi ac yn cael eu cefnogi yn ystod rhai o’r cyfnodau anoddaf yn eu bywydau.
“Rwy’n ymgymryd â’r her hon oherwydd fy mod i eisiau rhoi rhywbeth yn ôl i elusen sy’n rhoi cymaint i eraill.”
Drwy ymgymryd â Hanner Marathon Caerdydd, mae Jane yn gobeithio codi arian hanfodol i helpu Elusen Iechyd Caerdydd a’r Fro i barhau i gefnogi cleifion, teuluoedd a staff pan fyddant ei angen fwyaf.
Os hoffech chi gefnogi her Jane, ystyriwch gyfrannu trwy ei thudalen JustGiving. Bydd pob cyfraniad, mawr neu fach, yn helpu i greu’r profiadau hynny o gysur, tosturi a gofal ledled Caerdydd a’r Fro.