Mae Elusen Iechyd Caerdydd a’r Fro, elusen swyddogol Bwrdd Iechyd Prifysgol Caerdydd a’r Fro, yn gweithio gyda Gwasanaethau Ystadau Arbenigol NWSSP ac Asiantau Eiddo Savills ynghylch datganiadau o ddiddordeb ar gyfer gwerthu Ysbyty Rookwood yn ei gyfanrwydd neu rannau ohono yn unig.
Yn 2020, caewyd prif ran Ysbyty Rookwood pan gafodd Gwasanaethau Adsefydlu’r Asgwrn Cefn a Niwroadsefydlu eu hadleoli i Ysbyty Athrofaol Llandochau. Ar hyn o bryd, mae’r Gwasanaethau Aelodau Artiffisial a Chyfarpar (ALAS), Technoleg Gynorthwyol Electronig (EATS), Gwasanaeth Asesu Symudedd a Gyrru Cymru (WMDAS), Canolfan Brechu Torfol a Therapi Galwedigaethol yn parhau i fod yn weithredol ar y safle, ac mae darpariaethau yn eu lle i sicrhau bod y gwasanaethau hyn yn parhau i weithredu’n ddidrafferth yn ystod y cyfnod hwn.
Gyda dau adeilad rhestredig Gradd II – Rookwood House a’r tŷ haf – yn ogystal â’r ffaith bod y safle wedi’i gynnwys yng Nghofrestr o Dirweddau, Parciau a Gerddi o Ddiddordeb Hanesyddol Arbennig yng Nghymru (Gradd II) anstatudol Cadw, a bodolaeth nifer fawr o goed sydd wedi’u gwarchod gan Orchmynion Cadw Coed, nid yw’r safle bellach yn hyfyw. Oherwydd y cyfyngiadau hyn o amgylch yr ystad, ni all yr eiddo gynnig ei hun i fod y math o ysbyty modern sydd ei angen i ddarparu’r gofal gorau i’w gleifion a’i staff.
Adeiladwyd Ysbyty Rookwood yn wreiddiol ar ddiwedd y 1860au ar gyfer y Cyrnol Syr Edward Stock Hill, er y credir bod tirlunio wedi dechrau mor gynnar â’r 1770au pan ddaeth y tiroedd yn rhan o ystad Thomas Edward o Llandaff House. Defnyddiwyd y tŷ am y tro cyntaf ar gyfer gofal iechyd ym 1917, gan adsefydlu cleifion a oedd wedi dioddef parlys, ac ar gyfer darparu aelodau artiffisial, cyfarpar a chymhorthion.
Buddiolwyr gwerthiant Ysbyty Rookwood fydd Elusen Iechyd Caerdydd a’r Fro lle bydd yr arian yn cael ei ddefnyddio i gefnogi cleifion, staff, ymwelwyr a’r gymuned.
Mae datganiadau o ddiddordeb ar agor tan hanner dydd ddydd Mercher 21 Chwefror 2024.
I gael rhagor o wybodaeth, gweler y llyfryn yma.
Darllenwch ei’n Cwestiynau Cyffredin yma.