Yn ddiweddar mae Elusen Iechyd Caerdydd a’r Fro wedi cefnogi sefydliad Phoenix Community drwy roi dodrefn newydd yn eu hystafell staff o Gyllid Covid-19, gan helpu i wneud amgylchedd gweithio gwell i staff.
Uned adsefydlu iechyd meddwl oedolion yng Nghaerdydd yw Phoenix Community. Ar gyfartaledd bydd cleifion yn aros yno rhwng 12 a 24 mis.
Mae’r staff yn Phoenix Community yn rhoi gofal nyrsio 24 awr, saith diwrnod yr wythnos, gan helpu cleifion gyda phethau ymarferol fel siopa, coginio a rheoli arian.
Mae staff Phoenix Community yn helpu cleifion i ddysgu neu adennill sgiliau mewn amgylchedd diogel ac anogol lle maent yn cael eu cefnogi i wynebu heriau, teimlo’n ddigon diogel i beidio bod ofn gwneud camgymeriadau a dysgu o’r profiadau hyn. Mae staff wrth law i fonitro ac asesu cynnydd a bod yn fodelau rôl.
Dywedodd Owen Baglow, Dirprwy Reolwr Ward yn Phoenix Community: “Ar ran yr holl staff yn Phoenix Community, hoffwn ddweud diolch yn fawr iawn i’r staff codi arian yn y swyddfa Elusennol am wneud yr ystafell staff yn bosibl. Mae’r lle ar wahân a gafodd ei ariannu gan yr Elusen Iechyd o gyllid Covid-19 wedi bod yn werthfawr iawn o ran gwella ysbryd a lles staff yn y gweithle.”
Os ydych eisiau mwy o wybodaeth am sut gall yr Elusen Iechyd helpu i wneud gwahaniaeth yn eich ardal chi ewch i: www.healthcharity.wales neu anfonwch neges e-bost at fundraising.cav@wales.nhs.uk