Rydym yn falch iawn o groesawu arddangosfa newydd Ysbyty’r Barri gan Sight Life, grŵp ffotograffiaeth pobl ddall a rhannol ddall.
Mae’r grŵp wedi tynnu lluniau sy’n amrywio o fywyd gwyllt i gerddorion yn perfformio, yn ogystal â phortreadau a themâu art deco.
Sight Life yw’r enw gweithredu newydd ar gyfer Sefydliad y Deillion Caerdydd. Wedi’i sefydlu ym 1865, Sight Life yw un o elusennau hynaf Cymru ac mae’n parhau i ddarparu cyngor hanfodol ac ystod o wasanaethau i gefnogi pobl ddall a rhannol ddall ledled De Cymru i fwynhau bywydau annibynnol, gweithgar, cymdeithasol a chyflawn.
Dywedodd aelod gweithredol o’r grŵp, Des Radcliffe, sydd wedi’i gofrestru’n ddall ac a arferai fod yn ffotograffydd llawrydd: “Mae’r arddangosfa’n dangos bod pobl nad ydynt o reidrwydd yn gallu gweld yn dda iawn, yn dal i allu cael bywyd llawn hwyl yn gwneud yr hyn maen nhw’n ei fwynhau. Mae’r grŵp wedi dewis sampl o’n gwaith i’w arddangos, a gobeithiwn y bydd y cyhoedd yn eu cael yn ysbrydoledig ac yn mwynhau’r arddangosfa.”
Mae’r grŵp yn cyfarfod yn rheolaidd yn ystafell weithgareddau Sight Life yn ei chanolfan yng Nghaerdydd ac wedi trefnu teithiau ffotograffiaeth i Amgueddfa Genedlaethol Cymru, Sain Ffagan Amgueddfa Werin Cymru, Clwb Pêl-droed Dinas Caerdydd, Y Theatr Newydd, Bae Caerdydd, Castell Caerffili, a llawer o lefydd eraill o ddiddordeb yn ardal De Cymru a’r cymoedd a’r cyffiniau.
Mae Sight Life a’r grŵp ffotograffiaeth yn ddiolchgar i Fwrdd Iechyd Prifysgol Caerdydd a’r Fro am eu cefnogaeth.
