Mae Elusen Iechyd Caerdydd a’r Fro yn falch o gyhoeddi bod Jasamin Martin, Arweinydd Tîm Cadw Tŷ, wedi’i choroni’n Arwr Iechyd ar gyfer mis Mawrth.
A hithau’n gweithio yn Nhŷ Aberteifi, mae Jasamin wedi’i chanmol am ei gwaith glanhau arbennig a’i hymagwedd wych, cymaint nes iddi gael dyrchafiad yn Arweinydd Tîm yn ddiweddar.
Dywedodd Lisa Merriman, yr Ysgrifennydd Meddygol, “Ni allaf ailadrodd ddigon faint o wahaniaeth y mae Jasamin wedi’i wneud i’n llety, ac felly i les cyffredinol ein cydweithwyr. Mae Tŷ Aberteifi yn berffaith, ac mae mor hyfryd gweld Jasamin yn ymfalchïo yn ei gwaith, fel y dylai! Mae hi’n gwneud dod i mewn i’r gwaith gymaint yn haws gan fod y lle yn olau ac yn lân – mae fframiau drysau, canllawiau’r grisiau, byrddau sgyrtin, i gyd wedi cael ‘Triniaeth Jasamin’, ac ni ellir dod o hyd i unrhyw lwch o gwbl.
“Ar ôl gweithio yn yr adeilad hwn ers bron i 10 mlynedd, ni fu safon glanweithdra erioed mor uchel â hyn, ac ni allwn ddiolch digon iddi am ei holl waith caled.”
Dywedodd Zoe Jennings, Nyrs Arbenigol Ffeibrosis Systig Plant, “Mae Jasamin yn hollol anhygoel. Mae hi bob amser yn cyrraedd gyda’r wên fwyaf a gair caredig i bawb. Mae hi’n bleser pur ei chael o gwmpas y swyddfa. Mae hi’n bywiogi ein dyddiau ac yn cadw golwg ar bob aelod o’r tîm ac mae’n rhan fawr iawn o’r tîm ei hun. Dwi wir yn credu ei bod hi’n haeddu trît am ei holl waith caled iawn.”
Bydd Jasamin yn Arwr Iechyd ar gyfer mis Mawrth ac yn derbyn rhodd gan y noddwr, Park Plaza Caerdydd. Mae hi wrth ei bodd gyda’r enwebiad am y wobr.
Caiff y Wobr Arwr Iechyd ei chefnogi gan Elusen Iechyd Caerdydd a’r Fro a Park Plaza Caerdydd.
Os ydych chi’n adnabod rhywun sydd wedi gweithio’n ddiflino i helpu cydweithiwr neu glaf mewn lleoliad gofal iechyd ledled Bwrdd Iechyd Prifysgol Caerdydd a’r Fro ac yn haeddu cydnabyddiaeth, rhowch wybod i ni. Er mwyn enwebu eich Arwr Iechyd: E-bostiwch: fundraising.cav@wales.nhs.uk Dylai enwebiadau gynnwys: Eich enw, manylion cyswllt, enw’r enwebai a’i rôl, yn ogystal â rhai geiriau yn egluro pam yn union eich bod chi’n credu ei fod yn haeddu cael ei goroni’n Arwr Iechyd.
Os ydych chi eisoes wedi enwebu rhywun, bydd yn cael ei gynnwys yn awtomatig yn y rownd nesaf i’w ystyried ar gyfer y wobr.
Defnyddiwch #ArwrIechydCAF ar Twitter i roi’r gair ar led a dangos eich cefnogaeth i’n GIG anhygoel!